bloubulblog.co.za

Die nie-amptelike Blou Bul ondersteuners blog

Met ‘n swaar gemoed

Posted by Laagvat April - 16 - 2012 - Monday 4 COMMENTS
Dit is vandag met ‘n swaar gemoed dat ek die nuus met julle deel dat die bloubulblog nie meer sal voortgaan nie. Ek, Doelskop en Vastrap is op ‘n stadium in ons lewens wat dit baie moeilik maak om tyd opsy te sit vir die blog. Tussen die drie van ons kan ons nie meer die blog op datum hou nie, en ek is seker meeste van julle kan die verskil sien van verlede jaar tot nou.

Ons sal die blog in sy huidige formaat op die web los vir ‘n wyle, maar sal nie meer artikels plaas nie. Die skryf, en redigeer van artikels plaas te veel druk op ons vrye tyd.
Wees verseker dat hierdie besluit nie ligtelik geneem is nie.
Ek sal wel nog op twitter wees by @bloubulblog en gesels graag daar oor Blou Bul rugby.
Nou die Blou!

Bulls ransel Lions af in die leeukraal

Posted by Laagvat April - 16 - 2012 - Monday ADD COMMENTS

Die Vodacom Bulls het Saterdagaand met ‘n bonuspunt oorwinning oor die Lions hul posisie op die Super Rugby punte-leër verstewig, en staan nou op dieselfde aantal punte as ‘n sekere span uit Slaapstad.

Die Bulls het 5 drieë teenoor 2 gedruk, om met 32-18 te seëvier op Ellis Park. Die telling vertel egter nie die volle verhaal nie. Die Ligbloues het etlike kanse gehad, net om dit te verbrou, en die punteverskil kon maklik dubbeld soveel gewees het. Morne Steyn het weer gesukkel met die skopvoet, en kon die keer net met 3 pogings uit 8 slaag, voorwaar rede tot groot kommer.

Daar was egter skitterspel op die dag deur CJ Stander, Jacques Potgieter en JJ Engelbrecht. Stander is beloon met ‘n drie, sowel as die speler van die wedstryd toekenning vir sy bydrae op die dag. Potgieter het weer sy opponente uit die aarde geloop, en voos geduik.

Engelbrecht het nuwe lewe in die nommer 13 trui geblaas, na Johann Sadie tot dusver nie regtig kon oortuig nie. JJ se goeie vertoning sal afrigter Frans Ludeke twee keer laat dink oor wie teen die Brumbies moet uitdraf as Wynand Olivier se sentermaat.

Chiliboy Ralepelle het sy goeie vorm voortgesit, en het die tuisspan lekker gepla by die afbreekpunte. Dan het Dean Greyling voor sy besering ‘n keer of wat sterk met die bal gehardloop, en Elton Jantjes sal vir maande lank nog nagmerries kry oor Greyling en Stander wat op hom afnael.

Terwyl die resultaat van ‘n bonuspunt oorwinning presies is wat die ondersteuners wil hê, lê daar nog harde werk voor. Soveel kanse kan ons nie verspeel teen beter opposisie nie.

Die punte makers:

MTN Lions –Drieë: Tian Meyer, Joshua Strauss. Doelskop: Elton Jantjies. Strafskoppe: Elton Jantjies, Jaco Taute.

Vodacom Bulls –Drieë: Akona Ndungane, Francois Hougaard, Zane Kirchner, CJ Stander, Juandre Kruger. Doelskoppe: Morné Steyn(2). Strafskop: Morné Steyn

JJ, Wilhelm kry kans in beginspander is

Posted by Laagvat April - 11 - 2012 - Wednesday 7 COMMENTS

Die afrigter van die Vodacom Bulls, Frans Ludeke het besluit om JJ Engelbrecht en Wilhelm Steenkamp los te laat op die Lions hierdie komende Saterdag.

Beide die spelers het gereelde verskynings op die veld gemaak die seisoen, maar dit was nog elke keer van die reserwebank af. Veral Engelbrecht het telke male ‘n verskil gemaak van die bank af, en moes al ‘n paar maal vir Johann Sadie vervang as gevolg van ligte stampe en stote.

Dit is dan ook in Sadie se plek wat JJ Saterdag sal opdraf. Sadie is een van drie reserwe agterspelers, die ander is Jano Vermaak en Louis Fouche.

JJ klop al heel seisoen hard aan die deur, na hy elke keer ‘n wesenlike verskil maak aan die agterlyn. Sy sterk verdediging sal ons handig te pas kom teen die Johannesburgers, en sy sterk hardloopwerk met sy uitstekende vermoëns om aansluiting te vind, kan die tuisspan kopsere besorg.

Persoonlik voel ek tot dusver dat JJ ‘n beter seisoen as Sadie beleef, maar mens moet ook ingedagte hou dat JJ eerder ‘n vleuel as ‘n senter is, en dat Sadie herstel het van ‘n besering. Dan het JJ ook die luukse om gereeld op die veld te verskyn as die Ligbloues reeds die oorhand het. Dit sal interessant wees om te sien of hy net so groot impak kan maak in die beginspan.

Wilhelm Steenkamp begin in die plek van Juandre Kruger, en sal ook die lynstaantekens oorneem. Steenkamp is ‘n baie goeie lynstaanspringer, en is uitstekend by afskoppe.

Daar kan verwag word dat beide Juandre Kruger en Johann Sadie kans sal kry laat in die wedstryd, en ek reken veral Kruger kan baljaar teen ‘n pak voorspelers wat al moeg gedryf is.

Verder is die span onveranderd, en sal hoop om die Lions oortuigend te klop. Die Bulls het skaflik vertoon oor die laaste 3 naweke as hul opposisie in ag geneem word, en hul sal hoop dat Saterdag se wedstryd ‘n kans op ‘n drieë bonuspunt sal bied.

Voor hul egter oor daardie bonuspunt kan dink, moet hul seker maak van die basiese aspekte van die spel. Ons hantering kan beter, en ook ons dissipline verbeter nie, selfs na daar week na week beloof word dat daar hard gewerk is agter die skerms.

Die span vir Saterdag se wedstryd lyk so (met getal wedstryde in hakies):

Zane Kirchner (60), Akona Ndungane (73), JJ Engelbrecht (6), Wynand Olivier (92), Bjorn Basson (31), Morné Steyn (95), Francois Hougaard (34), Pierre Spies (78, c), Jacques Potgieter (6), CJ Stander (6), Wilhelm Steenkamp (41), Flip van der Merwe (40), Werner Kruger (64), Chiliboy Ralepelle (41), Dean Greyling (21).

Reserwes: Bongi Mbonambi (1), Frik Kirsten (8), Juandré Kruger (6), Arno Botha (3), Jano Vermaak (78), Louis Fouché (4), Johann Sadie (11).

Voorspelling: Vodacom Bulls vs Crusaders, Saterdag 7 April 2012

Posted by Laagvat April - 5 - 2012 - Thursday 2 COMMENTS

Die Vodacom Bulls is gekwes na ‘n nederlaag teen die Stormers in Slaapstad verlede naweek, en nou dat hul terug is in die Bulkraal, sal hul hul Super Rugby veldtog terug op die wenpad wil kry. Hul teenstanders Saterdag op Loftus is die Crusaders, een van die mees suksesvolle Super Rugby spanne ooit.

Die Crusaders het hierdie seisoen nog nie die wêreld aan die brand gespeel nie, en sukkel veral met baie hanteerfoute. Die manne van Canterbury beskerm egter hulle bal goed, en hou daarvan om die wydte van die veld te gebruik.

Met Dan Carter wat onlangs teruggekeer het na ‘n besering, sal die Crusaders hoop daar is ‘n oplewing in hul spel. Verlede naweek het Tom Taylor die stelskoppe waargeneem uit die buitesenter posisie, maar hierdie naweek behoort Carter die leisels oor te neem.

Een van die groot bekommernisse vir Bulls-afrigter, Frans Ludeke bly sy span se dissipline. Verlede Saterdag is 15 strafskoppe afgestaan, en was dit nader, of selfs onder die 10-merk, kon die uitslag anders gewees het. Soos die manne van Supersport egter in hul SuperWrap kolom skryf, die Bulls behoort nou elke tegniese punt van elke skrumreël te verstaan, want hulle is al wraggies vir elke moontlike situasie gestraf!

Gepraat van die skrums, die voorry van Werner Kruger, Chiliboy Ralepelle en Dean Greyling kom teen hul strafste toets te staan as hul kragte meet met Owen Franks, Corey Flynn en Wyatt Crockett. Min ondersteuners sal stry met ‘n stelling dat die drie Nieu-Seelanders die sterkste voorry in die kompetisie is. Met beide Kruger en Greyling wat die jaar al telke male gestraf is, kan die skrums ‘n deurslaggewende rol speel op die uitslag.

Dan het die besoekers se agterste driehoek teen die Lions begin wys waartoe hul in staat is. Indien Israel Dagg, Sean Maitland en Zac Guildford te veel spasie gegun word, sal daar perde wees! Terwyl ek Maitland en Guildford nie vreeslik hoog aanslaan nie, is hulle baie gevaarlike afronders. Agter hulle is Dagg sekerlik een van die opwindendste heelagters in die kompetisie.

Dan sal die jong Johann Sadie wil vergoed vir sy verdedigingsblapse teen die Stormers. Die foute het sy span nie regtig punte gekos nie, maar teen die sterke Robbie Fruean sal Sadie sy keer moet ken.

Met Deon Stegmann wat nogsteeds buite aksie is, sal CJ Stander weer die nommer 6 trui dra. Stander sal by die afbreekpunte bygestaan word deur Chiliboy Ralepelle, wat teen die Stormers puik was op die grond. Hulle kom te staan teen Matt Todd, wat menigte spanne se harte al gebreek het my sy balsteel-vermoëns.

Die Bulls is die gunstelinge vir die wedstryd, bloot as gevolg van die tuisveldvoordeel. Terwyl die Saders nog nie op alle silinders vuur nie, is hulle ‘n kwaliteit span, en dit kan net ‘n kwessie van tyd wees voor alles in plek val. Die Bulls moet seker maak hulle ontwrig die Crusaders se voorspelers, dit sal ‘n groot rol daarin speel om die Crusaders se skakelpaar onder druk te plaas. Dit sal verseker dat die Crusaders se gevaarlike buite-agterspelers nie spasie het nie.

Morne Steyn sal egter sy kouse moet optrek, en sal wil wys dat hy nog net so dodelik korrel as altyd. Hy sal ook  beter moet inskop, en afskop, en sy lynskoppe sal van so aard moet wees, dat Dagg en sy vleuels nie vinnige lynstane kan neem nie.

Hierdie kan ‘n klipharde wedstryd wees, met die Saders se skakelpaar wat ‘n wedstryd baie goed kan beheer, as hulle die kans gegee word. Ek voorspel egter dat die gekweste Bulls met 4 punte sal seëvier op hul tuisveld. Wat dink jy gaan die uitslag wees?

Die spanne lyk so:

Bulls – 15 Zane Kirchner, 14 Akona Ndungane, 13 Johann Sadie, 12 Wynand Olivier, 11 Bjorn Basson, 10 Morne Steyn, 9 Francois Hougaard, 8 Pierre Spies (c), 7 Jacques Potgieter, 6 CJ Stander, 5 Juandre Kruger, 4 Flip van der Merwe, 3 Werner Kruger, 2 Chiliboy Ralepelle, 1 Dean Greyling.
Subs: 16 Bongi Mbonambi, 17 Frik Kirsten, 18 Wilhelm Steenkamp, 19 Arno Botha, 20 Jano Vermaak, 21 Louis Fouche, 22 JJ Engelbrecht.

Crusaders - 15 Israel Dagg, 14 Sean Maitland, 13 Robbie Fruean, 12 Ryan Crotty, 11 Zac Guildford, 10 Dan Carter, 9 Andy Ellis, 8 Kieran Read (c), 7 Matt Todd, 6 George Whitelock, 5 Sam Whitelock, 4 Luke Romano, 3 Owen Franks, 2 Corey Flynn, 1 Wyatt Crockett.
Subs: 16 Quentin MacDonald, 17 Ben Franks, 18 Tom Donnelly, 19 Luke Whitelock, 20 Willi Heinz, 21 Tom Taylor, 22 Tom Marshall.

Vorige uitslae

2011 Crusaders 27 - 0 Bulls
2010 Bulls 39 - 24 Crusaders
2010 Bulls 40 - 35 Crusaders
2009 Bulls 36 - 23 Crusaders
2009 Crusaders 16 - 13 Bulls
2008 Bulls 19 - 54 Crusaders
2007 Bulls 27 - 12 Crusaders
2007 Crusaders 32 - 10 Bulls
2006 Crusaders 35 - 15 Bulls
2006 Bulls 17 - 35 Crusaders
2005 Bulls 35 - 20 Crusaders
2004 Crusaders 40 - 21 Bulls
2003 Bulls 32 - 31 Crusaders
2002 Canterbury 49 - 15 Bulls
2001 Northern Bulls 29 - 42 Canterbury Crusaders
2000 Canterbury 75 - 27 Northern Bulls
1999 Northern Bulls 28 - 30 Crusaders
1998 Canterbury 31 - 20 Northern Bulls
1997 Blue Bulls 23 - 22 Canterbury
1996 Canterbury 18 - 34 Northern Transvaal

Ludeke maak geen veranderinge

Posted by Laagvat April - 4 - 2012 - Wednesday 2 COMMENTS

Die span van die Vodacom Bulls wat Saterdag teen die Crusaders op Loftus Versfeld speel, is dieselfde een wat verlede naweek met ‘n bonuspunt van Nuweland teruggekeer het.

Die Vodacom Bulls se afrigter, Frans Ludeke, het sy vertroue in dieselfde 22-tal as teen die Stormers uitgespreek om teen die spogspan van Canterbury te speel.

Ludeke het gesê sy span kry ‘n kans om die foute van verlede naweek reg te stel, maar bygevoeg dat die Crusaders selfs meer eise as die Stormers kan stel, al is die wedstryd op Loftus Verfeld.

“Hulle het ‘n magdom All Blacks en ‘n klomp van hulle was deel van die span wat die Wêreldbekertoernooi gewen het. Hulle beskik dus oor die vaardighede en temperament om wedstryde soos dié te wen. Ons durf egter nie tuiswedstryde prysgee nie en besef watter skade ‘n nederlaag ons veldtog kan aandoen.”

Ludeke het ook gesê die beseerde haker, Willie Wepener, kan tussen drie weke en drie maande buite aksie wees.

“Willie het ‘n virus opgedoen wat sy gesigspiere aantas en ongelukkig is daar nie ‘n behandeling wat dit onmiddelik kan regstel nie. Dit beteken dat hy nie in die volgende paar weke vir ons sal kan speel nie. Ons het egter baie vertroue in Bongi Mbonambi, wat deur ons junior strukture gevorder het.”

Die span (met getal Super-wedstryde) is:

Zane Kirchner (59), Akona Ndungane (72), Johann Sadie (10), Wynand Olivier (91),  Bjorn Basson (30), Morné Steyn (94), Francois Hougaard (33), Pierre Spies (77, k), Jacques Potgieter (5), CJ Stander (5), Juandré Kruger (5),   Flip van der Merwe (39), Werner Kruger (63), Chiliboy Ralepelle (40), Dean Greyling (20).

Plaasvervangers: Bongi Mbonambi* (0), Frik Kirsten (7), Wilhelm Steenkamp (40), Arno Botha (2), Jano Vermaak (77), Louis Fouché (4), JJ Engelbrecht (5).

17 Bulletjies haal vergrote Baba Bokkies oefengroep

Posted by Laagvat April - 4 - 2012 - Wednesday 1 COMMENT

Die Blou Bulle het 17 spelers in die o20 Bokkies se vergrote oefengroep wat ‘n oefenkamp van 10 tot 23 April sal bywoon in Slaapstad… ekskuus, Kaapstad.

Die enigste ander unie wat naby aan die getal spelers kom, is die Westelike Provinsie met 10 spelers.

Daar is wel ‘n paar spelers wat as gevolg van Super Rugby verpligtinge, en beserings, nie oorweeg is vir die oefengroep nie. Steven Kitshoff (WP), Paul Jordaan (Sharks), Johan Goosen (Vrystaat), William Small Smith (Blou Bulle), Paul Willemse (Goue Leeus), Ruan Botha (Goue Leeus), Ettiene Oosthuizen (Goue Leeus) sal almal wel in aanmerking kom vir die finale groep vir die o20 Wêreldtoernooi in Stellenbosch en Kaapstad later vanjaar.

Tydens die oefenkamp sal daar twee wedstryde gespeel word teen ‘n span van Argentinië. Die kragmetings sal op 14, en 21 April plaasvind in Stellenbosch. Daar sal ook ‘n weekwedstryd teen ‘n uitnodigingspan, wat meestal uit o19 spelers sal bestaan, gespeel word.

Afrigter Dawie Theron het ‘n paar o19 spelers gekies vir die groep, met die oog op volgende jaar. Dit sal hom en sy keurders die kans gee om te kyk na die volgende generasie spelers, en sal vir ‘n handvol spelers die kans gee om die Baba Bokkies twee jaar agtereenvolgens te verteenwoordig. Op hierdie jonge ouderdom is ‘n ekstra seisoen se ervaring goud werd.

Die Blou Bul spelers sluit ‘n paar van Tukkies se Varsity Cup en Young Guns sterre in, onder andere Tuks o20 kaptein Marvin Orrie en sy spanmaats Shaun Adendorf, Travis Ismail en Neethling Fouche. Dan sal spelers soos Tony Jantjes, Jan Serfontein en Wian Liebenberg hoop dat hul Vodacombeker-ervaring handig te pas sal kom in hul strewe om opgeneem te word in die finale groep.

Maak ons trots, Bulletjies!

Die SA o20 oefengroep is:

Blou Bulle:

Abrie Griesel, Hendrik van Wyk, Jan Serfontein, Jason Thomas, Marzuq Maarman, Jaco Visagie, Rudi van Rooyen, Shaun Adendorf, Tony Jantjies, Travis Ismail, Wian Liebenberg, Jacques du Plessis (o19), Andrew Beerwinkel (o19), Leneve Dames (o19), Marvin Orrie (o19), Neethling Fouche (o19), Ruwellyn Isbell (o19).

Vrystaat:

Kevin Luiters, JJ de Klerk, Hlanhla Hlungwane (o19).

Goue Leeus:

Fabian Booysen, Marais Schmidt, Mark Pretorius, Ruan Venter, Vian van der Watt, Harold Vorster (o19).

Sharks:

Allan Dell, Franco Marais, Braam Steyn, Khaya Majola, Nicolaas van Dyk, Pieter Steph du Toit.

Westelike Provinsie:

Cobus Nel, Dean Hammond, Dillyn Leyds, Lungelo Chonco, Patrick Howard, Rayn Smid, Kobus van Wyk, Stephan Coetzee, Tshotsho Mbovane, John Ben Kotze (o19).

Swart, nee Pienk dag op Nuweland

Posted by Doelskop April - 2 - 2012 - Monday 15 COMMENTS

Die Bulls het Saterdag vasgeval teen die Stormers op Nuweland en met 20 -17 verloor op ‘n dag wat seker meer pienk as swart beskou kan word. Voor ek oor die wedstryd gesels, as ‘n baie passievolle Bulls ondersteuner was die pienk gewaad nou glad nie vir my mooi nie. Behalwe vir die pienk truie, moes hulle nou nog met pienk broeke en pienk kouse ook uitdraf, en ek is jammer maar Dean Greyling of Pierre “Die Bus is Vol” Spies lyk glad nie so goed of eerder skrikwekkend in pienk nie. Maar dit daar gelaat…

Soos ons maar altyd verwag van ‘n wedstyd tussen die Bulls en die Stormers was dit ‘n harde wedstryd en was dit ‘n wedstryd wat enige kant toe kon gaan. Ek beskou dit as ‘n wedstryd wat die eerste helfte aan die Stormers behoort en die tweede helfte aan die Bulls.  Die Bulls het die eerste helfte vir my bietjie deurmekaar gelyk en dit het gelyk of die fokus nie daar was nie. Op ‘n stadium het ek gedink hulle emosies kry dalk die oorhand en Craig Joubert het skuins voor halftyd die Bulls gewaarsku nadat Juandre Kruger ‘n paar keer oortree het, en Dean Greyling ook so paar keer gelyk het of hy sy humeur verloor. (Dit was wel lekker om te sien hoe hy vir Andries Bekker met ‘n een hand stamp op die grond laat sit het).

In dieselfde asem dink ek die Bulls was gefrustreerd met die Stormers wat bitter naby aan die onkant lyn was en ook met geniepsigheid wat deur Joubert oorsien was. Tiaan Liebenberg kon op enige ander dag ‘n geel kaart vir ‘n “Professional Foul” gekry het toe hy vir Basson vasgehou het om te keer dat hy vir die bal gaan. Joubert het net vir hom gesê “Don’t be Silly”. Duane Vermeulen het met moord weg gekom en kon die Bulls net eenvouding nie momentum op bou nie. Craig Joubert het vir my glad nie so goeie wedstryd geblaas soos wat almal sê nie, dit het gevoel of hy ons die heeltyd straf, maar vir dieselfde oortredings waarsku hy net die Stormers, en knoop hy geselsies aan met Jean de Villiers.

Die tweede helfte het die Bulls baie goed gespeel en ek wonder nog altyd wat word in daardie kleedkamer vir hulle gesê. Basson het sy spoed gewys met ‘n goeie drie nadat die Stormers die bal verloor het, en met Wynand Olivier se drie het dit vinnig gelyk of die Bulls dalk net hierdie wedstryd kan deur trek. Morne Steyn het ongelukkig weer ‘n effense af dag gehad met die skopvoet met twee mislukte strafskoppe en ‘n skepskop wat kort was.

Die Stormers het die voortou geneem net voor die eindfluitjie met ‘n baie ge-debateerde beslissing. En ek wil sê dat dit ‘n baie swak beslissing was deur Joubert (wat dit verseker was), maar ek dink die hele kwessie rondom skrum reëls is duister en moes daardie nie ‘n strafskop gewees het teen die Bulls nie. Ek dink ons het dieselfde gevoel gehad as die Cheetahs so paar naweke gelede toe hulle ook ‘n strafskop afgestaan het by die skrum onder dieselfde omstandighede en hulle die wedstryd verloor het.

Op die einde van die dag sê die telbord die Bulls het verloor, en sekere dinge het op die dag net nie in ons guns getel nie. Ek dink as ‘n opsomming van die wedstryd het die Bulls goed gespeel, en het die span wat bekend staan vir hardloop rugby (Dis nou die Stormers) nie baie gehardloop nie, en het hulle baie verdedig, en vir die span wat ook veronderstel is om die beste op verdediging te wees het die Bulls twee keer agter hulle doel lyn gaan kuier.  Ek glo die Bulls sal hierdie week hard werk en gaan ons die naweek die Crusaders laat les opsê op Loftus.

Nou die blou!

(‘n Vriend van my is ‘n rugby skeidsregter op ‘n hoë vlak, en hier is wat hy vir my gesê nadat ek hom gevra het oor die skrum reëls na die strafskop teen die Bulls saterdag. – Doelskop, daardie strafskop was verkeerdelik teen die Bulls gegee. Op die kykweer was dit baie duidelik dat die Stormer stut pad gegee het wat veroorsaak het dat Dean Greyling “op” gaan. Die strafskop moes eintlik teen die Stormers gewees het. Oor die algemeen word die span op verdediging gestraf veral as die skrum meer as een keer gevorm moet word. Dit is ongelukkig die skeidsregter se diskressie maar ek stem saam dat daar te veel waarde aan sekere skrum reëls gevoeg word. (Strafskop teen oor ‘n Vryskop).

 

Nommer een posisie op die spel in Kaapstad

Posted by Laagvat March - 29 - 2012 - Thursday 5 COMMENTS

Die Vodacom Bulls en die DHL Stormers pak mekaar Saterdagaand in ‘n wedstryd op Nuweland met die nommer 1 posisie op die punte-leër wat op die spel is. Met die nuwe konferensie stelsel wat die punte-leër snaaks laat lees, kan ‘n Kaapse sege die Bulls hul 4e plek laat omruil met die Stormers.

Die Kapenaars sal, soos in die onlangse verlede, meeste van hul energie gebruik om ons baldraers agter die voordeellyn te probeer stuit. Dit is ‘n taktiek wat die Sharks veral, maar ook die Stormers, in die laaste twee jaar met welslae gebruik het. Kry hulle dit reg om Dean Greyling, Flip van der Merwe en Jacques Potgieter agter die voordeellyn te stuit, sal die besoekers sukkel om momentum op te bou. Word die stormramme nie gestuit nie, kan dit ‘n lang dag vir die tuisspan word.

Uit die Wes-Kaap word groot lawaai gemaak oor die Ligbloues wat heelmiddag net gaan skop en jaag, en daar word wyd en syd vertel dat Alistair Coetzee en sy span presies weet wat die Bulls gaan maak. Wel, ek weet nie of hulle hulself net onnosel hou, en of hulle dalk regtig so deur die weer is nie. Die Bulls het verlede naweek in die eerste helfte die Reds van hulle voete afgehardloop, voor hulle in die tweede helfte hul spel afgewissel het, en die gebruiklike hangskoppe begin jaag het.

Coetzee het baie ondersteuners verras deur Rynhard Elstadt te kies op flank, met Duane Vermeulen wat weer sal uitdraf op agsteman. Die skuif om Nick Koster uit te laat, kan gesien word as ‘n kompliment vir die Bulls se baldraers en lynstaanspringers. Weereens is dit die opposisie wat skuiwe maak om ons te neutraliseer, terwyl ons net aanhou doen wat ons doen.

Terwyl die stryd tussen die twee pakke voorspelers ‘n spektakel sal opdis, gaan veral die lynstane ‘n hele paar ondersteuners se monde laat water. Andries Bekker sal saam met Elstadt en die jong Eben Etzebeth probeer om Juandre Kruger, van der Merwe en Pierre Spies se balle in die lynstaan te steel. By die skrums sal die Bulls hoop dat die harde werk wat gedurende die week ingesit is, vrugte sal afwerp. Verlede week is Dean Greyling nie een keer gestraf nie, na hy tot dusver die seisoen gesukkel het met sy bind. Dit was egter die keer sy stutmaat, Werner Kruger se beurt om gepenaliseer te word.

Die twee pakke voorspelers sal egter mekaar ook wil wys wie nou regtig die beste rolmaal in die Super Rugby kompetisie het. Beide spanne het al verskeie drieë so aangeteken, en dit gaan dalk meer gaan oor watter span die beste daarteen verdedig, eerder as die rolmaal die beste uitvoer.

In die middelveld sal nog ‘n fel stryd afspeel tussen die twee senterpare. Jean de Villiers en Juan de Jongh meet kragte met Wynand Olivier en Johann Sadie. Olivier het telke male al sy WP-teenstanders ore aangesit, en geoordeel op sy vorm tot dusver, sal de Villiers en de Jongh hulle keer moet ken.

Dan is daar ook ‘n goeie kans dat die humeure kan opvlam, met spelers soos Bryan Habana, Gerhard van den Heever en Burton Francis wat voorheen vir die besoekers gespeel het, terwyl die Bulls onlangs vir Johann Sadie en JJ Engelbrecht afgerokkel het by die Stormers.

Ek sien dat die algemene gevoel is dat die Stormers hierdie wedstryd in die sakkie het. Dit is verseker nie ‘n uitgemaakte saak nie, en ek het so gevoel die Bulls gaan soos verlede seisoen maak, en die Stormers op Nuweland klop. As ek my kop op ‘n blok moet sit, sal ek sê die Bulls sal die oorhand hê met so 3 punte.

Die spanne lyk so:

Bulls – 15 Zane Kirchner, 14 Akona Ndungane, 13 Johann Sadie, 12 Wynand Olivier, 11 Bjorn Basson, 10 Morné Steyn, 9 Francois Hougaard, 8 Pierre Spies (c), 7 Jacques Potgieter, 6 CJ Stander, 5 Juandré Kruger, 4 Flip van der Merwe, 3 Werner Kruger, 2 Chiliboy Ralepelle, 1 Dean Greyling.

Reserwes: 16 Bongi Mbonambi, 17 Frik Kirsten, 18 Wilhelm Steenkamp, 19 Arno Botha, 20 Jano Vermaak, 21 Louis Fouché, 22 JJ Engelbrecht.

Stormers - 15 Joe Pietersen, 14 Gio Aplon, 13 Juan de Jongh, 12 Jean de Villiers (c), 11 Bryan Habana, 10 Peter Grant, 9 Dewaldt Duvenage, 8 Duane Vermeulen, 7 Rynhardt Elstadt, 6 Siya Kolisi, 5 Andries Bekker, 4 Eben Etzebeth, 3 Brok Harris, 2 Tiaan Liebenberg, 1 Steven Kitshoff.

Reserwes: 16 Deon Fourie, 17 Frans Malherbe, 18 De Kock Steenkamp, 19 Nick Koster, 20 Louis Schreuder, 21 Burton Francis, 22 Gerhard van den Heever.

Ludeke behou wenspan

Posted by Laagvat March - 28 - 2012 - Wednesday 1 COMMENT

Die span van die Vodacom Bulls wat Saterdag teen die Stormers op Nuweland in Kaapstad speel, toon geen veranderinge aan die een wat verlede Saterdag met die Reds afgereken het nie.

Afrigter Frans Ludeke kon weer dieselfde beginspan kies, die eerste keer vanjaar dat beserings nie sy keuses verander nie.

Hy moes nietemin ‘n verandering aan die plaasvervangerbank maak, waar Willie Wepener weens ‘n ontsteekte senuwee in sy gesig moes onttrek.

Bongi Mbonambi, wat tot dusver in die Blou Bulle se Vodacombekerspan diens gedoen het, is in sy plek gekies. Dit sal Mbonambi se debuut in die Vodacom Super Rugby-reeks wees as hy speelkans kry.

Ludeke het sy tevredenheid met die span se voorbereiding en vordering in die reeks uitgespreek.

“Ons het verlede week goed gedoen teen die verdedigende kampioene, maar dié week wag die enigste onoorwonne span in die kompetisie. Die Stormers is ‘n gevestigde span vol ervaring en om hulle op hul tuisveld te gaan klop, sal ‘n spesiale poging verg.”

Volgens die Bulls-kaptein, Pierre Spies, bring die Noord/Suid-wedstryde altyd die beste uit spelers uit.

“Daar is ook baie emosies en dit is iets wat ons moet beheer, want dit gaan belangrik wees om as ‘n span te speel, klinies te wees en nie toelaat dat emosies jou opsies belemmer nie. Ons het nog ‘n lang pad oor in die kompetisie, maar hierdie is beslis een van ons groot uitdagings.”

Die span (met getal Super-wedstryde) is: Zane Kirchner (58), Akona Ndungane (71), Johann Sadie (9), Wynand Olivier (90), Bjorn Basson (29), Morné Steyn (93), Francois Hougaard (32), Pierre Spies (76, k), Jacques Potgieter (4), CJ Stander (4), Juandré Kruger (4), Flip van der Merwe (38), Werner Kruger (62), Chiliboy Ralepelle (39), Dean Greyling (19). Plaasvervangers: Bongi Mbonambi (0)*, Frik Kirsten (6), Wilhelm Steenkamp (40), Arno Botha (1), Jano Vermaak (76), Louis Fouché (4), JJ Engelbrecht (4).

* Debuut

Slegs een verandering vir Blou Bulle

Posted by Laagvat March - 28 - 2012 - Wednesday ADD COMMENTS

Hulle moet nou daardie momentum behou wat met die goeie sege afgelope naweek opgebou is, ongeag die moeilike taak om die Luiperds op hul tuisveld in Portchefstroom te probeer tem, het die Blou Bulls-afrigter, Pine Pienaar, Woensdag gesê.

Ná hulle puik sege oor die Goue Leeus is die span gretig om op die wenpad te bly, het Pienaar laat blyk.

“Ons moet aanhou verbeter. Om met ‘n nederlaag en toe ‘n gelykop-uitslag te begin was nie goed genoeg nie en daarom was die sege teen die Leeus ‘n bevestiging van waartoe ons in staat is. Die Luiperds weg is ‘n taaie, maar ons het nie ‘n keuse anders as om te wen as ons steeds op die punteleer wil vorder nie.”

Pienaar het een gedwonge skuif aan sy beginspan gemaak nadat Bongi Mbonambi in die Vodacom Bulls se groep opgeneem is.

Robbie Coetzee vervang hom, met Jacques Momberg wat Coetzee se plek op die bank inneem.

“Beide is ervare spelers wat hulle kant sal bring,” het Pienaar gesê.

Die span wat Saterdag teen die Luiperds in Potchefstroom speel, is:

Ulrich Beyers, Sampie Mastriet, Jan Serfontein, Francois Venter, Jurgen Visser, Tony Jantjies, Ruan Snyman, Jono Ross, Jean Cook, Warwick Tecklenburg, Cornell Hess, Gerrit-Jan van Velze (k), Rayno Gerber, Robbie Coetzee, Vincent Koch.

Plaasvervangers: Jacques Momberg, Basil Short, Franco Mostert, Daniel Adongo, Rudi van Rooyen, Wesley Dunlop, Clayton Blommetjies.

Wil jy deel wees van blou bul blog?